மணம்

எப்பாடு பட்டாவது 
திருமணம் செய்து கொண்டுவிடு 
என்றான் நண்பன் 
ஏனென்று கேட்டால் 
தற்கொலையிலிருந்து 
விடுபடுவாய் 
ஆனால் 
கொலை செய்யப்பட 
வாய்ப்புண்டு
என்றான் 

இறை

 கடவுளின் தொல்லை தாளாமல் 
ஒரு நாள் அவனை 
இருட்டறையில் அடைத்து வைத்தேன்
அந்த நாள் 
இரவெல்லாம் 
ஒரே அழுகை 
அறையே நீரில் 
மூழ்கியது 
அடுத்த நாள் 
மக்கிப்போன வாசம் வந்தது 
திறந்து பார்த்தால் 
இறைவன் எரிந்து கொண்டிருந்தான் 
நேற்றைய தண்ணீரை 
நெருப்பாய் மாற்றி இருப்பான் 
ஆனாலும் வெளியே 
அனுப்ப மனமில்லை 
அனுப்பினால் நடக்கும் 
விபரீதங்கங்களுக்கு 
அவனும் பொறுப்பேற்க 
மாட்டேன் என்கிறான் 
என்னையும் விட்டு விலக 
மாட்டேன் என்கிறான் 
அடுத்த நாள் இரவு 
அங்கிருந்த புகை 
அடங்கிப்போனது 
உள்ளே நறுமணம்
இறைவன் வாசமாகி 
உள்ளேயே நிறைத்து வைத்தான் 
ஆனாலும் வெளியே 
அனுப்ப மனமில்லை 
வெளியே நான் மட்டும் 
சென்றேன் 
சுத்தமாக மிக இலகுவாக 
இருந்தேன் 
அன்றைய இரவு 
அவன் மக்கிப்போன 
குப்பையாகிப் போனான் 
மொத்தத்தில் 
அவனுக்கு பைத்தியம் 
பிடித்துவிட்டது என 
அறிந்து கொண்டேன் 
இனி வெளியே விட்டுவிடலாம் 
குப்பையை யார் 
கண்டுகொள்ளப்போகிறார்கள் 
கொட்டிவிட்டேன் 
ஒரு துறவி தூக்கிச்சுமந்தான்
இமயமலையில் 
கொட்டிவிடுவானாம்
இத்தனை நடந்தும் 
ஒரு வார்த்தை அவன் பேசவில்லை 
இறைவனுக்கு வாய் பேச
வராது என நினைக்கிறேன்.

மடி

இறந்த பின் 
நான் முன்பிருந்த 
இடத்திற்கெல்லாம் 
சென்று வரலாம் 
என்றொரு வரம் 
கிடைத்தது
ஒவ்வொருவர் மடியிலும் 
ஒரு முறை கிடந்து வந்தேன் 
மனைவியின் மடியில் 
இன்னும் என் வாசம் 
சுற்றிக்கொண்டு இருந்தது 
மகனின் மடியில் 
என் ஒற்றை 
நரை முடி தள்ளாடிக்கொண்டிருந்தது 
தந்தையின் மடியில் 
என் எச்சில் 
உலர்ந்து கிடந்தது 
தாயின் மடியை 
தேடித்தேடி 
அலைந்தேன் 
இன்னொருவன் சொன்னான் 
தாயின் மடி எப்போதும் கிடைக்காது 
அவளுக்கு நிரந்தர வரம் உண்டு 
மகவுகளுக்கு பின் 
திரிந்தலையும் வரம்
உன் பின்னால் தான் இருக்கிறாள் 
பின் பார்த்தால் 
உனக்கு நிறைய நரை முடி 
தலைக்கு எண்ணெய் வெச்சிட்டே இரு 
என்றாள்

கங்கு

 எங்கெங்கு காணினும்
என்னைத் தேடியலைந்தேன்.
கருவில் என்னைக் கேட்டேன்
அது நான் இல்லை
இந்தப்பெண்ணின் ஆங்காரம்
என்றது
பள்ளியில் என்னைக் கேட்டேன்
புத்தக அடுக்கில்
நீ ஒரு காகிதம் என்றது
மணத்தில் என்னைக் கேட்டேன்
காதலின் ஒரு தேய்பிறைத்துளி
என்றது
அலுவலில் என்னைக் கேட்டேன்
முதல் போட்டவனுக்கு
அடிமையானவன் நீ
என்றது
முதுமையில் கேட்டேன்
அமிழ்ந்து கொண்டிருக்கும் 
ஒரு துளி
என்றது
இன்னும் எப்போது தான் நான்
எனக் கேட்டேன்
காத்திரு
என்றது
சிதையில் சிதையும்
முன் கேட்டேன்
உன்னைப் பற்றிய
முதல் கங்கு தான்
நீ
என்றது!!!

நாம்

நான் நீ 
நீ நானா 
எனக்கேட்டபோது 
நீ நான் 
ஆனால் 
நான் நாம் 
என்றாள்!!