மூக்கு நுனி

அடங்கிப்போன ஒவ்வொருவருக்கும் 
பேசும் ஆசை வந்தது 
மண் பிளந்தது 
நனைந்த சாம்பல் புகை கிளப்பியது 
தொண்டை செருமிக்கொண்டன 
அடங்கியவை இப்படி பேசின
இப்போதாவது குறையுங்கள்
நீங்கள் பேசும் பேச்செல்லாம் 
எங்களின் அமைதியை 
நோக்கி வருகின்றன 
நாங்கள் அமைதி இழந்தால் 
உங்களுக்கு வாரிசுகள் அமையாது 
அப்படியே அமைந்தாலும் அது 
பேரிரைச்சலோடு பிறக்கும் 
குறைவாக பேசுங்கள்
உங்கள் காலடி மண்ணில் இருக்கும் 
எங்களின் மூக்கு நுனி 
உங்களை எப்போதும் பாராட்டும்